ಜಮ್ಮು ಮತ್ತು ಕಾಶ್ಮೀರದ ನಿಯಂತ್ರಣ ರೇಖೆಯ (ಎಲ್‌ಒಸಿ) ವಿಭಜಿತ ಭಾಗಗಳ ನಡುವೆ ನಡೆಯುವ ವ್ಯಾಪಾರವು ರಾಜ್ಯದೊಳಗೆ ನಡೆಯುವ ಅಂತರ್‌ ರಾಜ್ಯ ವ್ಯಾಪಾರ ಎಂದು ಪರಿಗಣಿಸಲ್ಪಡುತ್ತದೆ ಎಂದು ಜಮ್ಮು ಮತ್ತು ಕಾಶ್ಮೀರ ಹಾಗೂ ಲಡಾಖ್ ಹೈಕೋರ್ಟ್ ತೀರ್ಪು ನೀಡಿದೆ. ಪ್ರಸ್ತುತ ಪಾಕಿಸ್ತಾನದ ನಿಯಂತ್ರಣದಲ್ಲಿರುವ ಪ್ರದೇಶಗಳು (ಪಾಕ್‌ ಆಕ್ರಮಿತ ಕಾಶ್ಮೀರ - ಪಿಒಕೆ) ಜಮ್ಮು ಮತ್ತು ಕಾಶ್ಮೀರದ ಭಾಗವೇ ಆಗಿವೆ. ಹಾಗಾಗಿ, ಇದು ಭಾರತದ ಭಾಗವಾಗಿದೆ ಎಂದು ನ್ಯಾಯಾಲಯ ಹೇಳಿದೆ [ಮೆಸರ್ಸ್‌ ನ್ಯೂ ಜೀ ಎನ್ & ಸನ್ಸ್ ವರ್ಸಸ್‌ ಯೂನಿಯನ್ ಆಫ್ ಇಂಡಿಯಾ & ಅದರ್ಸ್].
ಶ್ರೀನಗರ-ಮುಜಫರಾಬಾದ್ ಮತ್ತು ಪೂಂಚ್-ರಾವಲಕೋಟ್ ಮಾರ್ಗಗಳಲ್ಲಿ ಭಾರತ ಮತ್ತು ಪಾಕಿಸ್ತಾನದ ನಡುವೆ ವಿಶ್ವಾಸ ವೃದ್ಧಿಯ ಕ್ರಮವಾಗಿ ನಿಯಂತ್ರಣ ರೇಖೆಯ ಎರಡೂ ಬದಿಯ ನಡುವಿ ವ್ಯಾಪಾರವನ್ನು ಅಕ್ಟೋಬರ್ 2008 ರಲ್ಲಿ ಪ್ರಾರಂಭಿಸಲಾಗಿತ್ತು. ಇದು ಮೂಲಭೂತವಾಗಿ ಎರಡೂ ಕಡೆಯಿಂದ ಕರೆನ್ಸಿ ವಿನಿಮಯವಿಲ್ಲದೆ ನಡೆಯುವ ಸರಕು ವಿನಿಮಯ ವ್ಯಾಪಾರವಾಗಿತ್ತು. ಈ ಅಂತರ ನಿಯಂತ್ರಣ ರೇಖಾ ವ್ಯಾಪಾರವು ಜಮ್ಮು ಮತ್ತು ಕಾಶ್ಮೀರದ ಸ್ಥಳೀಯ ಜನರ ನಡುವೆ ನಡೆಯುವ ವ್ಯಾಪಾರವಾಗಿತ್ತು. ಇದು ಸ್ಥಳೀಯ ಆರ್ಥಿಕತೆಗೆ ಲಾಭ ತರುವ ಗುರಿಯನ್ನು ಹೊಂದಿತ್ತು.
ಆದಾಗ್ಯೂ, ಪುಲ್ವಾಮಾ ದಾಳಿಯ ನಂತರ "ಅಕ್ರಮ ಶಸ್ತ್ರಾಸ್ತ್ರಗಳು, ಮಾದಕ ದ್ರವ್ಯಗಳು ಮತ್ತು ನಕಲಿ ಕರೆನ್ಸಿ ಇತ್ಯಾದಿಗಳಿಗೆ ಹಣಕಾಸು ಒದಗಿಸಲು "ವ್ಯಾಪಾರ ಮಾರ್ಗಗಳನ್ನು ದುರುಪಯೋಗಪಡಿಸಿಕೊಳ್ಳಲಾಗುತ್ತಿದೆ" ಎಂಬ ವರದಿಗಳ ಆಧಾರದಲ್ಲಿ 2019 ರಲ್ಲಿ ವ್ಯಾಪಾರವನ್ನು ಸ್ಥಗಿತಗೊಳಿಸಲಾಗಿತ್ತು.
ಅಂತರ ನಿಯಂತ್ರಣ ರೇಖಾ ವ್ಯಾಪಾರಕ್ಕೆ ಸಂಬಂಧಿಸಿದ ತೆರಿಗೆ ಪ್ರಕರಣವೊಂದರ ನಿರ್ವಹಣೆ ವೇಳೆ ನ್ಯಾಯಮೂರ್ತಿ ಸಂಜೀವ್ ಕುಮಾರ್ ಮತ್ತು ನ್ಯಾಯಮೂರ್ತಿ ಸಂಜಯ್ ಪರಿಹಾರ್ ಅವರ ವಿಭಾಗೀಯ ಪೀಠವು ಇದು ರಾಜ್ಯದೊಳಗೆ ನಡೆಯುವ ಅಂತರ್‌ ರಾಜ್ಯ ವ್ಯಾಪಾರವೆಂದು ತೀರ್ಪು ನೀಡಿದೆ,
ತೀರ್ಪಿನ ವೇಳೆ ನ್ಯಾಯಾಲಯವು ನಿಯಂತ್ರಣ ರೇಖೆಯ ಎರಡು ಬದಿಯ ಭಾಗಗಳ (ಪಾಕ್‌ ಆಕ್ರಮಿತ ಕಾಶ್ಮೀರ ಹಾಗೂ ಜಮ್ಮು ಮತ್ತು ಕಾಶ್ಮೀರ) ನಡುವಿನ ವ್ಯಾಪಾರವನ್ನು ಜಮ್ಮು ಮತ್ತು ಕಾಶ್ಮೀರ ರಾಜ್ಯದೊಳಗಿನ ವ್ಯಾಪಾಋ ಎಂದೇ ಪರಿಗಣಿಸಿದೆ. ಅದೇ ರೀತಿ, ತೆರಿಗೆ ವಿಚಾರವನ್ನೂ ಇತ್ಯರ್ಥಪಡಿಸಿದೆ.
ಸರಕುಗಳನ್ನು ವಿತರಿಸಿರುವವರ ಸ್ಥಳ ಹಾಗೂ ಸರಕುಗಳು ವಿತರಣೆಗೊಳಗಾದ ಸ್ಥಳ ಎರಡೂ ಅಂದಿನ ಜಮ್ಮು ಮತ್ತು ಕಾಶ್ಮೀರ ರಾಜ್ಯದೊಳಗಿನ (ಪ್ರಸ್ತು ಕೇಂದ್ರಾಡಳಿತ) ಭಾಗವೇ ಆಗಿದ್ದು, ಹಾಗಾಗಿ ಅರ್ಜಿದಾರರು ಹೂಡಿರುವ ಅಂದಿನ ತೆರಿಗೆ ಅವಧಿಗೆ ಸಂಬಂಧಿಸಿದ ಪ್ರಶ್ನೆಗಳು ರಾಜ್ಯದೊಳಗಿನ ವ್ಯಾಪಾರಕ್ಕೆ ಸಂಬಂಧಿಸಿದ್ದಾಗಿವೆ ಎಂದು ನ್ಯಾಯಾಲಯ ಹೇಳಿದೆ.
2017-2018, 2018-2019ರ ತೆರಿಗೆ ಅವಧಿಗೆ ಸಂಬಂಧಿಸಿದ ಜಿಎಸ್‌ಟಿ ನೋಟಿಸ್‌ಗಳ ಸಿಂಧುತ್ವದ ಕುರಿತಾದ ಪ್ರಕರಣ ನ್ಯಾಯಾಲಯದ ಮುಂದಿತ್ತು. ಹೀಗಾಗಿ, ತೆರಿಗೆ ವ್ಯಾಪ್ತಿಯ ಅಡಿಯಲ್ಲಿ ಈ ವ್ಯಾಪಾರವು ಎರಡು ರಾಷ್ಟ್ರಗಳ ನಡುವಿನ ವ್ಯಾಪಾರವೇ, ಎರಡು ರಾಜ್ಯಗಳ ನಡುವಿನ ವ್ಯಾಪಾರವೋ ಅಥವಾ ರಾಜ್ಯದೊಳಗಿನ ವ್ಯಾಪಾರವೋ ಎನ್ನುವ ಪ್ರಶ್ನೆ ಇತ್ತು. ಅರ್ಜಿದಾರರು ಮೊದಲಿಗೆ ಇದು ಆಮದು ಮತ್ತು ರಫ್ತಿನ ವ್ಯಾಪಾರ ಎಂದು ವಾದಿಸಿದ್ದರಾದರೂ ನಂತ ವಿಚಾರಣೆಯ ವೇಳೆ ಅವರ ವಕೀಲರು ಆ ವಾದದಿಂದ ಹಿಂಸರಿದಿದ್ದು ಇದು ಅಂತರ ಎಲ್‌ಒಸಿ ವ್ಯಾಪಾರವಾಗಿದ್ದು, ರಾಜ್ಯದೊಳಗಿನ ವ್ಯಾಪಾರವಾಗುತ್ತದೆ ಎನ್ನುವ ಅಭಿಪ್ರಾಯಕ್ಕೆ ಸಹಮತಿಸಿದ್ದರು.
ಅಂತಿಮವಾಗಿ ನ್ಯಾಯಾಲಯವು ಅಂತರ ನಿಯಂತ್ರಣ ರೇಖಾ ಸರಕು ವ್ಯಾಪಾರಿಗಳಿಗೆ ಸಿಜಿಎಸ್‌ಟಿ ಅಡಿ ನೀಡಲಾಗಿದ್ದ ನೋಟಿಸ್‌ಗಳ ಸಿಂಧುತ್ವವನ್ನು ಎತ್ತಿಹಿಡಿಯಿತು. ಅಲ್ಲದೆ, ವ್ಯಾಪಾರಿಗಳಿಗೂ ಸಹ ನೋಟಿಸ್‌ಗೆ ಸಂಬಂಧಿಸಿದಂತೆ ಸಿಜಿಎಸ್‌ಟಿ ಕಾಯಿದೆ 2017ರ ಅಡಿ ಪರಿಹಾರ ಪಡೆಯು ಅವಕಾಶವಿದೆ ಎನ್ನುವುದನ್ನು ದಾಖಲಿಸಿತು.