ಭಾರತೀಯ ದಂಡ ಸಂಹಿತೆಯ (ಐಪಿಸಿ) ಸೆಕ್ಷನ್ 498A ಅಡಿಯಲ್ಲಿ ಪತ್ನಿಯ ಮೇಲಿನ ಕ್ರೌರ್ಯದ ಅಪರಾಧವನ್ನು ದಾಖಲಿಸಲು ವರದಕ್ಷಿಣೆಗಾಗಿ ಬೇಡಿಕೆ ಇರಿಸಲೇಬೇಕೆಂಬುದು ಪೂರ್ವಾಪೇಕ್ಷಿತವಲ್ಲ ಎಂದು ಸುಪ್ರೀಂ ಕೋರ್ಟ್ ಹೇಳಿದೆ.
ಐಪಿಸಿ ಸೆಕ್ಷನ್ 498 ಎ ಅಡಿಯಲ್ಲಿ ಬರುವ ಅಪರಾಧದ ತಿರುಳು ಕ್ರೌರ್ಯದ ಕೃತ್ಯದಲ್ಲಿದೆಯೇ ಹೊರತು ವರದಕ್ಷಿಣೆಯ ಬೇಡಿಕೆಯ ಸುತ್ತ ಸುತ್ತುವುದಿಲ್ಲ ಎಂದು ನ್ಯಾಯಮೂರ್ತಿಗಳಾದ ವಿಕ್ರಮ್ ನಾಥ್ ಮತ್ತು ಪ್ರಸನ್ನ ಬಿ ವರಾಳೆ ಅವರ ಪೀಠ ಹೇಳಿದೆ.
ಆದ್ದರಿಂದ, ಸ್ಪಷ್ಟ ವರದಕ್ಷಿಣೆ ಬೇಡಿಕೆಯ ಅನುಪಸ್ಥಿತಿಯಲ್ಲಿ ನಡೆದಿರುವ ದೈಹಿಕ ಹಿಂಸೆ ಮತ್ತು ಮಾನಸಿಕ ಯಾತನೆಯ ಕೃತ್ಯಗಳು ಈ ಸೆಕ್ಷನ್‌ಅನ್ನು ಅನ್ವಯಿಸುವುದನ್ನು ನಿರಾಕರಿಸುವುದಿಲ್ಲ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
"ವರದಕ್ಷಿಣೆ ಬೇಡಿಕೆಯ ಉಪಸ್ಥಿತಿಯು ಸೆಕ್ಷನ್ ಅಡಿಯಲ್ಲಿ ಕ್ರೌರ್ಯವನ್ನು ನಿರೂಪಿಸಲು ಪೂರ್ವಾಪೇಕ್ಷಿತವಲ್ಲ" ಎಂದು ಡಿಸೆಂಬರ್ 12, 2024 ರ ಆದೇಶದಲ್ಲಿ ಸರ್ವೋಚ್ಚ ನ್ಯಾಯಾಲಯವು ಹೇಳಿದೆ.
ವರದಕ್ಷಿಣೆ ಬೇಡಿಕೆಯ ಉಪಸ್ಥಿತಿಯು ಸೆಕ್ಷನ್ 498ಎ ಅಡಿಯಲ್ಲಿ ಕ್ರೌರ್ಯವನ್ನು ನಿರೂಪಿಸಲು ಪೂರ್ವಾಪೇಕ್ಷಿತವಲ್ಲ.ಸುಪ್ರೀಂ ಕೋರ್ಟ್
ಆಲೂರಿ ತಿರುಪತಿ ರಾವ್ ಎಂಬುವರ ವಿರುದ್ಧದ ಸೆಕ್ಷನ್ 498 ಎ ವಿಚಾರಣೆಯನ್ನು ರದ್ದುಗೊಳಿಸಿದ ಆಂಧ್ರಪ್ರದೇಶ ಹೈಕೋರ್ಟ್ ತೀರ್ಪಿನ ವಿರುದ್ಧದ ಮೇಲ್ಮನವಿಯ ವಿಚಾರಣೆ ವೇಳೆ ನ್ಯಾಯಾಲಯ ಈ ಅಂಶಗಳನ್ನು ಸ್ಪಷ್ಟಪಡಿಸಿದೆ.
ರಾವ್ ತನ್ನ ಪತ್ನಿಯನ್ನು ಥಳಿಸಿ, ಮನೆಯಿಂದ ಹೊರಹೋಗುವಂತೆ ಒತ್ತಾಯಿಸಿದ್ದ ಎಂದು ಆರೋಪಿಸಲಾಗಿತ್ತು. ಪತ್ನಿ ಹಲವು ಬಾರಿ ಹಿಂತಿರುಗಲು ಯತ್ನಿಸಿದರೂ ಆಕೆಯನ್ನು ಮನೆಯೊಳಗೆ ಪ್ರವೇಶಿಸದಂತೆ ತಡೆಯಲಾಯಿತು ಎನ್ನುವುದು ಆರೋಪ. ನಂತರ ಪತ್ನಿ ಪತಿಯ ವಿರುದ್ಧ ಕ್ರೌರ್ಯದ ದೂರನ್ನು ದಾಖಲಿಸಿದ್ದರು.
ಇದರ ವಿರುದ್ಧ ಹೈಕೋರ್ಟ್ ಮೆಟ್ಟಿಲೆರಿದ್ದ ಆರೋಪಿ ಮತ್ತು ಕುಟುಂಬಸ್ಥರು ವರದಕ್ಷಿಣೆಗಾಗಿ ಕಿರುಕುಳ ನೀಡಿದ ಯಾವುದೇ ದೂರು ಇಲ್ಲದಿರುವುದರಿಂದ ತಮ್ಮ ವಿರುದ್ಧದ ಆರೋಪಗಳು ಐಪಿಸಿ ಸೆಕ್ಷನ್ 498 ಎ ಅಡಿಯಲ್ಲಿ ಅಪರಾಧವಾಗುವುದಿಲ್ಲ ಎಂದು ವಾದಿಸಿದ್ದರು. ಹೈಕೋರ್ಟ್ ಈ ವಾದವನ್ನು ಪುರಸ್ಕರಿಸಿತ್ತು.
ಹೈಕೋರ್ಟ್ ಆದೇಶದ ವಿರುದ್ಧ ಪತ್ನಿ ಸುಪ್ರೀಂ ಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಿದ್ದರು. ಸುಪ್ರೀಂ ಕೋರ್ಟ್‌ನ ಮುಂದೆ, ಆರೋಪಿಯು ಸೆಕ್ಷನ್ 498ಎ ವಿವರಣೆಯು ವಿಭಾಗದ ಅಡಿಯಲ್ಲಿ "ಕ್ರೌರ್ಯ" ವನ್ನು ರೂಪಿಸಲು ವರದಕ್ಷಿಣೆಗೆ ಬೇಡಿಕೆಯಿರಬೇಕು ಎಂದು ಪ್ರತಿಪಾದಿಸಿದ್ದ. ಈ ಹಿನ್ನೆಲೆಯಲ್ಲಿ ನ್ಯಾಯಾಲಯವು ನ್ಯಾಯಾಲಯವು ಸೆಕ್ಷನ್ 498ಎ ಅನ್ನು ಪರಿಶೀಲಿಸಿತು. ಮಹಿಳೆಯ ದೇಹ ಅಥವಾ ಆರೋಗ್ಯಕ್ಕೆ ದೈಹಿಕ ಮತ್ತು ಮಾನಸಿಕ ಹಾನಿ ಎರಡನ್ನೂ ಒಳಗೊಳ್ಳುವ 'ಕ್ರೌರ್ಯ'ದ ವಿಶಾಲ ಮತ್ತು ಅಂತರ್ಗತ ವ್ಯಾಖ್ಯಾನವನ್ನು ಈ ಸೆಕ್ಷನ್‌ನ ನಿಬಂಧನೆಯು ಒದಗಿಸುತ್ತದೆ ಎಂಬುದನ್ನು ನ್ಯಾಯಾಲಯವು ಗಮನಿಸಿತು.
ಕ್ರೌರ್ಯದ ಎರಡು ವಿಭಿನ್ನ ರೂಪಗಳನ್ನು 498ಎ ಗುರುತಿಸುತ್ತದೆ: ನಿಬಂಧನೆಯ (ಎ) ವಿವರಣೆಯು ದೈಹಿಕ ಅಥವಾ ಮಾನಸಿಕ ಹಾನಿಯನ್ನು ಒಳಗೊಂಡಿರುತ್ತದೆ ಮತ್ತು ಇನ್ನೊಂದು ನಿಬಂಧನೆ (ಬಿ) ವಿವರಣೆಯು ಆಸ್ತಿ ಅಥವಾ ಮೌಲ್ಯಯುತ ಭದ್ರತೆಗಾಗಿ ಕಾನೂನುಬಾಹಿರ ಬೇಡಿಕೆಗಳಿಗೆ ಸಂಬಂಧಿಸಿದ ಕಿರುಕುಳವನ್ನು ಒಳಗೊಂಡಿರುತ್ತದೆ. ಈ ಎರಡು ನಿಬಂಧನೆಗಳನ್ನು ವ್ಯತಿರಿಕ್ತವಾಗಿ ಓದಬೇಕು, ಅಂದರೆ ವರದಕ್ಷಿಣೆ ಬೇಡಿಕೆಯ ಉಪಸ್ಥಿತಿಯು ಸೆಕ್ಷನ್ ಅಡಿಯಲ್ಲಿ ಕ್ರೌರ್ಯವನ್ನು ಸ್ಥಾಪಿಸಲು ಪೂರ್ವಾಪೇಕ್ಷಿತವಲ್ಲ ಎಂದು ನ್ಯಾಯಾಲಯವು ಒತ್ತಿಹೇಳಿತು.
ಷರತ್ತಿನ (ಎ) ಕೊನೆಯಲ್ಲಿ “ಅಥವಾ” ಪದದ ಸೇರ್ಪಡೆಯು ಸೆಕ್ಷನ್ 498 ಎ ಉದ್ದೇಶಗಳಿಗಾಗಿ "ಕ್ರೌರ್ಯ" ಮಾನಸಿಕ ಅಥವಾ ದೈಹಿಕ ಹಾನಿಯನ್ನು ಉಂಟುಮಾಡುವ ಉದ್ದೇಶಪೂರ್ವಕ ನಡವಳಿಕೆಯನ್ನು ಒಳಗೊಂಡಿರುತ್ತದೆ ಅಥವಾ ವರದಕ್ಷಿಣೆಯಂತಹ ಕಾನೂನುಬಾಹಿರ ಬೇಡಿಕೆಗಳಿಗೆ ಸಂಬಂಧಿಸಿದ ಕಿರುಕುಳವನ್ನು ಒಳಗೊಂಡಿರುತ್ತದೆ ಎಂದು ಸ್ಪಷ್ಟವಾಗಿ ಸೂಚಿಸುತ್ತದೆ ಎಂದು ವಿವರಿಸಿತು.
ಆದ್ದರಿಂದ, ಸರ್ವೋಚ್ಚ ನ್ಯಾಯಾಲಯವು ಹೈಕೋರ್ಟ್ ಆದೇಶವನ್ನು ರದ್ದುಗೊಳಿಸಿ, ಸೆಕ್ಷನ್ 498A ಅಡಿಯಲ್ಲಿ ಕ್ರಿಮಿನಲ್ ಪ್ರಕ್ರಿಯೆಗಳನ್ನು ಮರುಸ್ಥಾಪಿಸಿತು.