ಅಕ್ರಮ ಹಣ ವರ್ಗಾವಣೆ ತಡೆ ಕಾಯಿದೆ (ಪಿಎಂಎಲ್ಎ) ರೀತಿಯ "ದಬ್ಬಾಳಿಕೆಯ" ಕಾನೂನುಗಳು ನ್ಯಾಯಾಂಗ ಮಧ್ಯಪ್ರವೇಶಕ್ಕೆ ಬಹಳ ಕಡಿಮೆ ಅವಕಾಶ ನೀಡುತ್ತವೆ. ಆ ಮೂಲಕ ಭಾರತದ ನ್ಯಾಯಿಕ ಪೂರ್ವನಿದರ್ಶನಗಳ (ಭವಿಷ್ಯದ ತೀರ್ಪುಗಳಿಗೆ ನ್ಯಾಯಿಕ ತತ್ವವನ್ನು ಒದಗಿಸುವಂತಹ ಹಿಂದಿನ ತೀರ್ಪುಗಳು) ಮೌಲ್ಯಗಳನ್ನು ಕೆಳಗಿಳಿಸಿವೆ ಎಂದು ಹಿರಿಯ ವಕೀಲ ಕಪಿಲ್ ಸಿಬಲ್ ಆತಂಕ ವ್ಯಕ್ತಪಡಿಸಿದರು.
ಸಿಕ್ಕಿಂ ನ್ಯಾಯಾಂಗ ಅಕಾಡೆಮಿಯಲ್ಲಿ ಶನಿವಾರ ನಡೆದ ಕಾರ್ಯಕ್ರಮವೊಂದರಲ್ಲಿ ರಾಜ್ಯಸಭಾ ಸದಸ್ಯರೂ ಆಗಿರುವ ಸಿಬಲ್ ಈ ವಿಚಾರ ತಿಳಿಸಿದರು.
ಸಿಬಲ್ ಅವರ ಭಾಷಣದ ಪ್ರಮುಖಾಂಶಗಳು
ನ್ಯಾಯಿಕ ಪೂರ್ವನಿದರ್ಶನವಾದಂತಹ ತೀರ್ಪುಗಳಿಗೆ ಮೌಲ್ಯವಿಲ್ಲವಾಗಿದೆ. ಕಾನೂನುಗಳು ಕಠಿಣವಾಗಿರುವುದರಿಂದ ಶಾಸನಬದ್ಧ ಕಾನೂನು ನ್ಯಾಯಾಂಗಕ್ಕೆ ಯಾವುದೇ ಆಸ್ಪದ ಇಲ್ಲದಂತೆ ಮಾಡಿದೆ.
ಸುಪ್ರೀಂ ಕೋರ್ಟ್ ಮತ್ತು ಹೈಕೋರ್ಟ್‌ಗಳಂತಹ ಸಾಂವಿಧಾನಿಕ ನ್ಯಾಯಾಲಯಗಳು ಮಾತ್ರ ದಬ್ಬಾಳಿಕೆಯ ಕಾನೂನುಗಳನ್ನು ರದ್ದುಗೊಳಿಸಲು ಸಾಧ್ಯವಿರುವುದರಿಂದ ಇದಕ್ಕೆ ಸಮಯ ಹಿಡಿದು ಅಧೀನ ನ್ಯಾಯಾಲಯಗಳು ಸ್ವತಂತ್ರವಾಗಿ ನಿರ್ಧಾರ ತೆಗೆದುಕೊಳ್ಳಲು ಕಡಿಮೆ ಅವಕಾಶ ದೊರೆಯುತ್ತದೆ
ವಿಜಯ್ ಮದನಾಲ್ ಚೌಧರಿ ಪ್ರಕರಣದಲ್ಲಿ ಪಿಎಂಎಲ್‌ಎಯ ಸಿಂಧುತ್ವವನ್ನು ಸುಪ್ರೀಂ ಕೋರ್ಟ್ ಎತ್ತಿಹಿಡಿದ ನಂತರ ಕಠಿಣತರವಾದ ಹಣ ವರ್ಗಾವಣೆ ನಿಗ್ರಹ ಕಾನೂನಿನಡಿ ಜಾಮೀನು ನೀಡುವುದು ವಿಚಾರಣಾ ನ್ಯಾಯಾಧೀಶರಿಗೆ ತುಂಬಾ ಕಷ್ಟಕರವಾಗಿದೆ.
ಪಂಕಜ್ ಪನ್ಸಾಲ್‌ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್ ಪಿಎಂಎಲ್ಎ ಆರೋಪಿಯ ಬಂಧನದ ಕಾರಣವನ್ನು ಲಿಖಿತವಾಗಿ ನೀಡಬೇಕು ಎಂದ ತೀರ್ಪು ನೀಡಿದ ಬಳಿಕವಷ್ಟೇ, ವಿಚಾರಣಾ ನ್ಯಾಯಾಲಯಗಳು ತಮ್ಮ ವಿವೇಚನಾಧಿಕಾರ ಚಲಾಯಿಸಲು ಸಾಧ್ಯವಾಯಿತು.
ಪಿಎಂಎಲ್ಎ ಕಾನೂನು ಪರಿಶೀಲಿಸುವಂತೆ ಕೋರಿದ ಅರ್ಜಿಗಳನ್ನು ಎರಡು ವರ್ಷಗಳಿಂದ ಮುಂದೂಡುತ್ತಾ ಬರಲಾಗಿದೆ.
ನ್ಯಾಯಾಂಗ ನಾಗರಿಕರ ಹಕ್ಕುಗಳ ರಕ್ಷಣೆಗೆ ಹೆಚ್ಚಿನ ಮುತುವರ್ಜಿ ವಹಿಸಬೇಕು.
ದಬ್ಬಾಳಿಕೆಯ ಕಾನೂನುಗಳಿಂದಾಗಿ ನ್ಯಾಯಿಕ ಪೂರ್ವನಿದರ್ಶನಗಳಿಗೆ ಆಸ್ಪದವೇ ಇಲ್ಲದಂತಾಗಿದೆ.
ಉನ್ನತ ನ್ಯಾಯಾಲಯ ಈ ಕುರಿತು ಕ್ರಮ ಕೈಗೊಳ್ಳಲು ಇದು ಸಕಾಲ.
ಭಾರತದ ಕ್ರಿಮಿನಲ್ ನ್ಯಾಯ ವ್ಯವಸ್ಥೆಯಲ್ಲಿ ವಸಾಹತುಶಾಹಿ ಪಳೆಯುಳಿಕೆ ಇದೆ. ಆರೋಪ ಅಥವಾ ದೂರನ್ನು ತನಿಖೆ ಮಾಡುವ ಮೊದಲೇ ಬಂಧನಕ್ಕೆ ಮುಂದಾಗುವ ಕೆಲವೇ ಕಾನೂನು ವ್ಯವಸ್ಥೆಗಳಲ್ಲಿ ಭಾರತವೂ ಒಂದಾಗಿದೆ
ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ, ಆರೋಪವನ್ನು ಮೊದಲು ತನಿಖೆ ಮಾಡಲಾಗುತ್ತದೆ ಮತ್ತು ನಂತರ ಬಂಧನ ನಡೆಯುತ್ತದೆ.
ಭಾರತದಂತಹ ದೇಶಗಳನ್ನು ಹೊರತುಪಡಿಸಿ ಬೇರೆಡೆ ಪೊಲೀಸ್‌ ರಿಮಾಂಡ್‌ ಇಲ್ಲ ವಸಾಹತುಶಾಹಿ ಪಳೆಯುಳಿಕೆ ಪೊಲೀಸರಿಗೆ ಈ ಅಧಿಕಾರ ನೀಡಿದೆ.
ವಸಾಹತುಶಾಹಿ ಯುಗದ ಭಾರತೀಯ ದಂಡ ಸಂಹಿತೆಯ ಬದಲು ಜಾರಿಗೆ ಬಂದ ಭಾರತೀಯ ನ್ಯಾಯ ಸಂಹಿತೆ, ಪರಿಸ್ಥಿತಿಯನ್ನು ಇನ್ನಷ್ಟು ಹದಗೆಡಿಸಿದೆ.
ಭಾರತೀಯ ಕ್ರಿಮಿನಲ್ ಕಾನೂನನ್ನು ಪರಿಷ್ಕರಿಸುವ ಅಗತ್ಯವಿದೆ.