![ಚುನಾವಣಾ ಪ್ರಚಾರಕ್ಕಾಗಿ ಅರವಿಂದ್ ಕೇಜ್ರಿವಾಲ್ಗೆ ಜಾಮೀನು ನೀಡಬಾರದು: ಸುಪ್ರೀಂನಲ್ಲಿ ಇ ಡಿ ಪ್ರಬಲ ವಾದ](http://media.assettype.com/barandbench-kannada%2F2024-05%2Fbba1249a-132b-4c70-b9a5-4046eb7172ff%2Famm0JuBz.jpg?w=480&auto=format%2Ccompress&fit=max)
ಲೋಕಸಭೆ ಚುನಾವಣೆಯ ಪ್ರಚಾರಕ್ಕಾಗಿ ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರಿಗೆ ಮಧ್ಯಂತರ ಜಾಮೀನು ನೀಡುವ ಸುಪ್ರೀಂ ಕೋರ್ಟ್ನ ಸಲಹೆಗೆ ಜಾರಿ ನಿರ್ದೇಶನಾಲಯ (ಇ ಡಿ) ಗುರುವಾರ ಬಲವಾಗಿ ವಿರೋಧ ವ್ಯಕ್ತಪಡಿಸಿದೆ [ಅರವಿಂದ್ ಕೇಜ್ರಿವಾಲ್ ಮತ್ತು ಜಾರಿ ನಿರ್ದೇಶನಾಲಯ ನಡುವಣ ಪ್ರಕರಣ].
ಚುನಾವಣಾ ಪ್ರಚಾರದ ಹಕ್ಕು ಮೂಲಭೂತ, ಕಾನೂನಾತ್ಮಕ ಅಥವಾ ಸಾಂವಿಧಾನಿಕ ಹಕ್ಕಲ್ಲ ಎಂದು ಇ ಡಿ ಸುಪ್ರೀಂ ಕೋರ್ಟ್ಗೆ ಸಲ್ಲಿಸಿದ ಅಫಿಡವಿಟ್ನಲ್ಲಿ ಹೇಳಿದೆ.
ಅಫಿಡವಿಟ್ನ ಪ್ರಮುಖಾಂಶಗಳು
ಕೇಜ್ರಿವಾಲ್ ಅಭ್ಯರ್ಥಿಯಲ್ಲದಿದ್ದರೂ ಅವರು ಬೇರೆ ರಾಜಕೀಯ ಮುಖಂಡರಿಗಾಗಿ ಪ್ರಚಾರ ನಡೆಸಲು ಮಧ್ಯಂತರ ಜಾಮೀನು ನೀಡಬಾರದು.
ಕಳೆದ 5 ವರ್ಷಗಳಲ್ಲಿ123 ಚುನಾವಣೆಗಳು ನಡೆದಿದ್ದು ಪ್ರಚಾರದ ಉದ್ದೇಶಕ್ಕಾಗಿ ಮಧ್ಯಂತರ ಜಾಮೀನು ನೀಡಿದರೆ ವರ್ಷಪೂರ್ತಿ ಚುನಾವಣೆ ಇರುವುದರಿಂದ ಯಾವುದೇ ರಾಜಕಾರಣಿಯನ್ನು ಬಂಧಿಸಿಡುವುದು ಸಾಧ್ಯವಾಗದು.
ಒಕ್ಕೂಟ ವ್ಯವಸ್ಥೆಯಲ್ಲಿ ಒಂದು ಚುನಾವಣೆಗಿಂತ ಇನ್ನೊಂದು ಮಿಗಿಲಲ್ಲ.
ಮಧ್ಯಂತರ ಜಾಮೀನಿನ ಮೇಲೆ ಬಿಡುಗಡೆ ಮಾಡದಿದ್ದಲ್ಲಿ, ತಮಗೆ ಸರಿಪಡಿಸಲಾಗದಷ್ಟು ಪರಿಣಾಮಗಳನ್ನು ಉಂಟಾಗಲಿದೆ ಎಂದು ಪ್ರತಿ ಹಂತದಲ್ಲೂ ಪ್ರತಿ ರಾಜಕಾರಣಿ ವಾದಿಸುತ್ತಾರೆ.
ಅಕ್ರಮ ಹಣ ವರ್ಗಾವಣೆ ಕಾಯಿದೆಯಡಿ ಪ್ರಸ್ತುತ ಅನೇಕ ರಾಜಕಾರಣಿಗಳು ನ್ಯಾಯಾಂಗ ಬಂಧನದಲ್ಲಿದ್ದಾರೆ. ಪಿಎಂಎಲ್ಎ ಅಲ್ಲದ ಅಪರಾಧಗಳಲ್ಲಿ ದೇಶದಾದ್ಯಂತ ಹಲವು ರಾಜಕೀಯ ನಾಯಕರು ಬಂಧನದಲ್ಲಿದ್ದಾರೆ. ಅರ್ಜಿದಾರರಾದ ಕೇಜ್ರಿವಾಲ್ ಅವರನ್ನು ವಿಶೇಷವಾಗಿ ಏಕೆ ನಡೆಸಿಕೊಳ್ಳಬೇಕು?
ರಾಜಕೀಯ ಪ್ರಚಾರಕ್ಕಾಗಿ ನೀಡುವ ಯಾವುದೇ ಮಧ್ಯಂತರ ಜಾಮೀನು ಸಮಾನತೆಯ ತತ್ವಕ್ಕೆ ವಿರುದ್ಧ ಮತ್ತು ತಾರತಮ್ಯಕ್ಕೆ ಎಡೆ ಮಾಡಿಕೊಡುತ್ತದೆ.
ಸ್ಪರ್ಧೆ ಮಾಡದ ರಾಜಕೀಯ ನಾಯಕನ ರಾಜಕೀಯ ಪ್ರಚಾರಕ್ಕಿಂತ ಸಣ್ಣ ರೈತ ಅಥವಾ ಸಣ್ಣ ವ್ಯಾಪಾರಿಯ ಕೆಲಸವು ಕಡಿಮೆ ಮಹತ್ವದ್ದಾಗಿದೆ ಎಂದು ಹೇಳಲು ಸಾಧ್ಯವಿಲ್ಲ ... ಒಬ್ಬ ರಾಜಕಾರಣಿ ಸಾಮಾನ್ಯ ವ್ಯಕ್ತಿಗಿಂತ ಹೆಚ್ಚಿನ ವಿಶೇಷ ಸ್ಥಾನಮಾನವನ್ನು ಪಡೆಯಲು ಸಾಧ್ಯವಿಲ್ಲ.
ಕೇಜ್ರಿವಾಲ್ ಅವರಿಗೆ ಮಧ್ಯಂತರ ಪರಿಹಾರ ನೀಡಿದರೆ, ಎಲ್ಲಾ ಬಂಧಿತ ರಾಜಕಾರಣಿಗಳು ತಮಗೂ ಜಾಮೀನು ನೀಡುವಂತೆ ಕೇಳುತ್ತಾರೆ.
ಸಿಎಂ ಪರವಾಗಿ ಯಾವುದೇ ವಿಶೇಷ ರಿಯಾಯತಿ ನೀಡಿದರೆ ಅದು ಕಾನೂನುಬದ್ಧ ಅಡಳಿತಕ್ಕೆ ವಿರುದ್ಧವಾಗುತ್ತದೆ.