ಸುಪ್ರೀಂ ಕೋರ್ಟ್ ಮುಖ್ಯ ನ್ಯಾಯಮೂರ್ತಿ (ಸಿಜೆಐ) ಎಸ್ ಎ ಬೊಬ್ಡೆ ನಂತರದ ಸ್ಥಾನದಲ್ಲಿದ್ದ ಹಿರಿಯ ನ್ಯಾಯಮೂರ್ತಿ ಹಾಗೂ ಹಲವು ರಾಜಕೀಯ ಮಹತ್ವದ ತೀರ್ಪು ಪ್ರಕಟಿಸಿದ ಅರುಣ್ ಮಿಶ್ರಾ ಅವರು ಇಂದು ನಿವೃತ್ತಿ ಹೊಂದಿದ್ದು, ಅವರನ್ನು ಬುಧವಾರ ಸಿಜೆಐ ಮತ್ತು ವಕೀಲರ ವೃಂದದ ಹಿರಿಯ ಸದಸ್ಯರು ಬೀಳ್ಕೊಟ್ಟರು.
ಸಂಪ್ರದಾಯದ ಪ್ರಕಾರ ಕೊನೆಯ ಕರ್ತವ್ಯದ ದಿನವಾದ ಇಂದು ನ್ಯಾಯಮೂರ್ತಿ ಮಿಶ್ರಾ ಅವರು ಸಿಜೆಐ ಬೊಬ್ಡೆ ಅವರೊಂದಿಗೆ ಪೀಠ ಹಂಚಿಕೊಂಡರು.
ಚುಟುಕು ವಿದಾಯ ಭಾಷಣ ಮಾಡಿದ ನ್ಯಾ. ಮಿಶ್ರಾ ಅವರು ತಾನು ಏನು ಮಾಡಿದ್ದೇನೋ ಅದು “ಈ ನ್ಯಾಯಾಲಯದ ಸರ್ವೋಚ್ಚ ಅಧಿಕಾರದಿಂದ ದೊರೆತಿದ್ದಾಗಿದೆ” ಎಂದು ವಿನಮ್ರವಾಗಿ ನುಡಿದರು.
“ನನ್ನ ಪಾಂಡಿತ್ಯಪೂರ್ಣ ಸಹೋದರರಿಂದ ಅಧಿಕಾರದ ಆಯುಧವನ್ನು ಎರವಲು ಪಡೆಯುವ ಪ್ರಯತ್ನವನ್ನು ನಾನು ಯಾವಾಗಲೂ ಮಾಡಿದೆ. ನಾನೇನು ಮಾಡಿದ್ದೇನೋ ಅದರ ಹಿಂದಿನ ಶಕ್ತಿ ನೀವು” ಎಂದು ಅವರು ನ್ಯಾಯವಾದಿ ವರ್ಗವನ್ನು ನೆನೆದರು.
ವಕೀಲ ವೃಂದಕ್ಕೆ ಕೃತಜ್ಞತೆ ಸಲ್ಲಿಸಿದ ನ್ಯಾ. ಮಿಶ್ರಾ ಅವರು ಹೀಗೆ ಹೇಳಿದರು,
ನ್ಯಾಯಮೂರ್ತಿಯಾಗಿ ವೃತ್ತಿ ಬದುಕು ಆರಂಭಿಸಿದಾಗಿನಿಂದಲೂ ತಾನು “ಆತ್ಮಸಾಕ್ಷಿಗೆ ಅನುಗುಣವಾಗಿ ಪ್ರತಿ ಪ್ರಕರಣದ ವಿಚಾರಣೆ ನಡೆಸಿರುವುದಾಗಿ” ನ್ಯಾ. ಮಿಶ್ರಾ ಹೇಳಿದರು.
ಹಿರಿಯ ವಕೀಲ ಪ್ರಶಾಂತ್ ಭೂಷಣ್ ಅವರ ವಿರುದ್ಧದ ನ್ಯಾಯಾಂಗ ನಿಂದನೆ ವಿಚಾರಣೆ ಕೈಗೊಂಡು, ತೀರ್ಪು ಪ್ರಕಟಿಸಿದ ಪ್ರಕರಣದ ಬಗ್ಗೆ ನ್ಯಾ. ಮಿಶ್ರಾ,
“...ಕೊನೆಯ ನ್ಯಾಯಾಂಗ ನಿಂದನಾ ಪ್ರಕರಣದಲ್ಲೂ ಅಟಾರ್ನಿ ಜನರಲ್ ಯಾವುದೇ ಶಿಕ್ಷೆ ನೀಡಬಾರದು ಎಂದರು (ಪ್ರಶಾಂತ್ ಭೂಷಣ್ ಗೆ) ಆದರೆ….” ಎಂದು ಮೌನಕ್ಕೆ ಶರಣಾದರು.
ಇದೇ ಮೊದಲ ಬಾರಿಗೆ ನ್ಯಾ. ಮಿಶ್ರಾ ಮತ್ತು ತಾನು ನ್ಯಾಯಪೀಠ ಹಂಚಿಕೊಳ್ಳುತ್ತಿದ್ದೇವೆ. ಇದೇ ಕೊನೆಯ ಬಾರಿಯೂ ಹೌದು ಎಂದು ಸಿಜೆಐ ಬೊಬ್ಡೆ ಹೇಳಿದರು.
ನ್ಯಾ. ಮಿಶ್ರಾ ಅವರ ಬೀಳ್ಕೊಡುಗೆ ಸಮಾರಂಭ ನಡೆಯುತ್ತಿದ್ದ ನ್ಯಾಯಾಲಯದ ಮೊದಲ ಕೊಠಡಿಯಲ್ಲಿ ಅಟಾರ್ನಿ ಜನರಲ್ ಕೆ ಕೆ ವೇಣುಗೋಪಾಲ್, ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ, ಸುಪ್ರೀಂ ಕೋರ್ಟ್ ವಕೀಲರ ಪರಿಷತ್ತಿನ ಅಧ್ಯಕ್ಷ ದುಷ್ಯಂತ್ ಧವೆ ಮತ್ತು ಸುಪ್ರೀಂ ಕೋರ್ಟ್ ನೋಂದಾಯಿತ ವಕೀಲರ ಸಂಸ್ಥೆಯ ಅಧ್ಯಕ್ಷ ಶಿವಾಜಿ ಜಾಧವ್ ಸೇರಿದಂತೆ ಹಲವು ವಕೀಲರು ಪಾಲ್ಗೊಂಡಿದ್ದರು.
ಅಟಾರ್ಜಿ ಜನರಲ್ ಕೆ ಕೆ ವೇಣುಗೋಪಾಲ್ ಅವರು ನ್ಯಾ. ಮಿಶ್ರಾ ಅವರನ್ನು ಸುಪ್ರೀಂ ಕೋರ್ಟ್‌ನ ಉಕ್ಕಿನ ನ್ಯಾಯಮೂರ್ತಿ ಎಂದು ಬಣ್ಣಿಸಿದರು. ನೆರೆದಿದ್ದ ಕಾನೂನು ಅಧಿಕಾರಿಗಳು ನ್ಯಾ. ಮಿಶ್ರಾ ಅವರ ದ್ವಿತೀಯ ಇನಿಂಗ್ಸ್ ಗೆ ಶುಭಕೋರಿದರು.