ಭಾರತೀಯ ರಾಷ್ಟ್ರೀಯ ರೈಫಲ್ ಅಸೋಸಿಯೇಷನ್ (ಎನ್‌ಆರ್‌ಎಐ) ರೀತಿಯ ಸಂಘ ಅಥವಾ ಕ್ಲಬ್ ಸದಸ್ಯರಾಗಿರುವವರು ಶಸ್ತ್ರಾಸ್ತ್ರ ಕಾಯಿದೆ 1959ರ ಪ್ರಕಾರ ಎರಡಕ್ಕಿಂತ ಹೆಚ್ಚು ಬಂದೂಕುಗಳನ್ನು ಖಾಯಂ ಆಗಿ ಇರಿಸಿಕೊಳ್ಳಲು ಅನುಮತಿ ನೀಡುವುದಿಲ್ಲ ಎಂದು ದೆಹಲಿ ಹೈಕೋರ್ಟ್ ಹೇಳಿದೆ [ಮಲ್ಹೋತ್ರಾ ಮತ್ತು ಭಾರತ ಒಕ್ಕೂಟ ಇನ್ನಿತರರ ನಡುವಣ ಪ್ರಕರಣ].
ಕ್ಲಬ್‌ಗಳು, ರೈಫಲ್ಸ್ ಅಸೋಸಿಯೇಷನ್‌ಗಳು ಶೂಟಿಂಗ್ ರೇಂಜ್‌ಗಳು ಮಿತಿ ಇಲ್ಲದೆ ಬಂದೂಕು ಇರಿಸಿಕೊಳ್ಳಬಹುದಾಗಿದ್ದರೂ ಅಂತಹ ಸಂಘ ಅಥವಾ ಕ್ಲಬ್‌ಗಳ ವೈಯಕ್ತಿಕ ಸದಸ್ಯರಿಗೆ ಆ ಅವಕಾಶ ಇಲ್ಲ ಎಂದು ನ್ಯಾಯಮೂರ್ತಿ ಯಶವಂತ್ ವರ್ಮಾ ಅವರಿದ್ದ ಏಕಸದಸ್ಯ ಪೀಠ ಹೇಳಿದೆ.
2019 ರ ತಿದ್ದುಪಡಿಯ ನಂತರ ಶಸ್ತ್ರಾಸ್ತ್ರ ಕಾಯಿದೆಯ ಸೆಕ್ಷನ್ 3(2) ರ ಪ್ರಕಾರ ಒಬ್ಬ ವ್ಯಕ್ತಿಗೆ ಎರಡಕ್ಕಿಂತಲೂ ಹೆಚ್ಚಿನ ಬಂದೂಕು ಹೊಂದಿದ್ದರೆ ಆತ ಎಸಿಪಿ (ಪರವಾನಗಿ) ಅವರಿಂದ ಅನುಮತಿ ಪಡೆಯಬೇಕು. ರೈಫಲ್ ಕ್ಲಬ್ ಅಥವಾ ಸಂಘದ ಸದಸ್ಯರಿಗೂ ಈ ಷರತ್ತು ಅನ್ವಯಿಸುತ್ತದೆ ಎಂಬ 2021 ರ ಆಗಸ್ಟ್ 31ರ ಆದೇಶ ಪ್ರಶ್ನಿಸಿ ಮೀತ್ ಮಲ್ಹೋತ್ರಾ ಸಲ್ಲಿಸಿದ ಅರ್ಜಿಯನ್ನು ಆ ಮೂಲಕ ನ್ಯಾಯಾಲಯ ತಿರಸ್ಕರಿಸಿತು.
ಅರ್ಜಿದಾರರು ಮೂರು ಬಂದೂಕುಗಳ ಪರವಾನಗಿ ಪಡೆದಿದ್ದು 2011ರಲ್ಲಿ ಎನ್‌ಆರ್‌ಎಐ ಸದಸ್ಯರಾಗಿದ್ದರು. ಕಾಯಿದೆಯಡಿ ಗುರುತಿಸಿಕೊಂಡ ಸದಸ್ಯರು ಸೆಕ್ಷನ್ 3 (2)ಗೆ ಹೊರತಾಗಿರುತ್ತಾರೆ ಎನ್ನುವುದು ಸೂಕ್ತವಾಗಿದೆ. ಅಂತಹ ಕ್ಲಬ್‌ಗಳ ಸದಸ್ಯರು ಎರಡಕ್ಕಿಂತ ಹೆಚ್ಚಿನ ಬಂದೂಕುಗಳನ್ನು ಇರಿಸಿಕೊಂಡಿದ್ದರೆ ಅವುಗಳನ್ನುಒಪ್ಪಿಸಬೇಕು ಎಂಬ ನೆಲೆಯಲ್ಲಿ 2019 ರ ತಿದ್ದುಪಡಿಯನ್ನು ಓದಕೂಡದು ಎಂಬುದು ಮಲ್ಹೋತ್ರಾ ಅವರ ವಾದವಾಗಿತ್ತು. ಆದರೆ ನ್ಯಾಯಾಲಯ ಈ ವಾದವನ್ನು ಒಪ್ಪಲಿಲ್ಲ.
ನ್ಯಾಯಾಲಯದ ಪ್ರಮುಖ ಅವಲೋಕನಗಳು
ಎರಡಕ್ಕಿಂತಲೂ ಹೆಚ್ಚು ಬಂದೂಕುಗಳನ್ನು ಇಟ್ಟುಕೊಳ್ಳಲು ವ್ಯಕ್ತಿಗೆ ಅವಕಾಶ ನೀಡುವುದು ಅಸಂಬದ್ಧ ಕಾರಣವಾಗುತ್ತದೆ. ಹಾಗೆ ಸದಸ್ಯನಿಗೆ ಅವಕಾಶ ನೀಡಿದರೆ ಆತ ಬಂದೂಕು ಮಾರಾಟಗಾರನಿಗೆ ಸಮನಾಗುತ್ತಾನೆ. ಇದು ಕಾಯಿದೆಯ ಉದ್ದೇಶಗಳನ್ನು ಮೀರಿದ್ದಾಗಿರುತ್ತದೆ.
ಶಸ್ತ್ರಾಸ್ತ್ರ ನಿಯಮಾವಳಿ- 2016ರ ಪ್ರಕಾರ ಈ ಸದಸ್ಯರಿಗೆ ಉಳಿದ ವ್ಯಕ್ತಿಗಳಿಗಿಂತಲೂ ಹೆಚ್ಚಿನ ಮದ್ದು ಗುಂಡು ಇರಿಸಿಕೊಳ್ಳಲು ಅವಕಾಶ ಇರಬಹುದು. ಆದರೆ ಶಸ್ತ್ರಾಸ್ತ್ರ ಕಾಯಿದೆಯಡಿ ಇಂತಹ ಸದಸ್ಯರಿಗೆ ಯಾವುದೇ ವಿಶಿಷ್ಟ ಸ್ಥಾನಮಾನ ಒದಗಿಸಲಾಗಿದೆ ಎಂದು ಅರ್ಥೈಸುವಂತಿಲ್ಲ.
ಎನ್‌ಆರ್‌ಎಐ, ರಾಜ್ಯ ರೈಫಲ್ ಅಸೋಸಿಯೇಷನ್‌ಗಳು, ಸಂಯೋಜಿತ ಜಿಲ್ಲಾ ರೈಫಲ್ ಅಸೋಸಿಯೇಷನ್‌ಗಳು, ಶೂಟಿಂಗ್ ಕ್ಲಬ್‌ಗಳು, ಶೂಟಿಂಗ್ ರೇಂಜ್‌ಗಳು ಅಥವಾ ಆಯಾ ರಾಜ್ಯದ ಕ್ರೀಡಾ ಪ್ರಾಧಿಕಾರಗಳಿಗೆ ಸಂಬಂಧಿಸಿದ ಶಸ್ತ್ರಾಸ್ತ್ರ ತಯಾರಕರು ಮತ್ತು ವಿತರಕರು ಮಾತ್ರ ಮಿತಿ ಇಲ್ಲದೆ ಶಸ್ತ್ರಾಸ್ತ್ರ ಇರಿಸಿಕೊಳ್ಳಬಹುದಾದ ಪರವಾನಗಿ ಪಡೆದ ವರ್ಗವಾಗಿದೆ.