ಜನವರಿ 1, 2022 ರಿಂದ ಹೈಕೋರ್ಟ್‌ಗಳಲ್ಲಿ ಸರ್ಕಾರ ಸಲ್ಲಿಸುವ ಎಲ್ಲಾ ಅರ್ಜಿ/ ಪ್ರಕರಣಗಳು ಇ-ಫೈಲಿಂಗ್ ಮೂಲಕ ಮಾತ್ರವೇ ಇರುವಂತೆ ನೋಡಿಕೊಳ್ಳಬೇಕು ಎಂದು ಸುಪ್ರೀಂಕೋರ್ಟ್‌ ಇ- ಸಮಿತಿ ಎಲ್ಲಾ ಹೈಕೋರ್ಟ್‌ಗಳಿಗೆ ನಿರ್ದೇಶನ ನೀಡಿದೆ.
ಆ ಬಳಿಕ ಸರ್ಕಾರ ಭೌತಿಕವಾಗಿ ಪ್ರಕರಣ ದಾಖಲಿಸಿದರೆ ಅದಕ್ಕೆ ಅನುಮತಿ ನೀಡುವುದಿಲ್ಲ ಎಂದು ಇ- ಸಮಿತಿ ಅಧ್ಯಕ್ಷ ನ್ಯಾ. ಡಿ ವೈ ಚಂದ್ರಚೂಡ್ ಹೈಕೋರ್ಟ್‌ಗಳಿಗೆ ಬರೆದಿರುವ ಪತ್ರದಲ್ಲಿ ತಿಳಿಸಿದ್ದಾರೆ.
ಇದಲ್ಲದೆ ಆದಾಯ, ತೆರಿಗೆ, ಮಧ್ಯಸ್ಥಿಕೆ, ವಾಣಿಜ್ಯ ವ್ಯಾಜ್ಯಕ್ಕೆ ಸಂಬಂಧಿಸಿದ ಕೆಲ ವರ್ಗಗಳಲ್ಲಿ ಮತ್ತು ಸಂಬಂಧಪಟ್ಟ ಹೈಕೋರ್ಟ್ ಸೂಕ್ತವೆಂದು ಪರಿಗಣಿಸುವ ಯಾವುದೇ ವರ್ಗಗಳಲ್ಲಿ ಎಲ್ಲಾ ಪಕ್ಷಕಾರರಿಗೆ ಜನವರಿ 1ರಿಂದ ಇ- ಫೈಲಿಂಗ್ ಮೂಲಕ ಅರ್ಜಿ ಸಲ್ಲಿಕೆ ಕಡ್ಡಾಯವಾಗಲಿದೆ.
ಅಧೀನ ನ್ಯಾಯಾಲಯಗಳ ತೀರ್ಪು/ಆದೇಶ ಪ್ರಶ್ನಿಸಿ ಸಲ್ಲಿಸಲಾಗುವ ಅರ್ಜಿಗಳು, ಮೇಲ್ಮನವಿಗಳು ಮತ್ತು ಮರುಪರಿಶೀಲನಾ ಅರ್ಜಿಗಳು ಕೂಡ ಜನವರಿ 1, 2022 ರಿಂದ ಇ ಫೈಲಿಂಗ್ ವಿಧಾನದಲ್ಲಿಯೇ ಕಡ್ಡಾಯವಾಗಿ ಸಲ್ಲಿಕೆಯಾಗಬೇಕಿದೆ.
ಮೇಲ್ಮನವಿ ಅಥವಾ ಮರುಪರಿಶೀಲನಾ ಅರ್ಜಿಯ ಇ- ಫೈಲಿಂಗ್ ಸಂದರ್ಭದಲ್ಲಿ, ವಿಚಾರಣಾ ನ್ಯಾಯಾಲಯದ ಅಗತ್ಯ ದಾಖಲೆಯನ್ನು ಮೇಲ್ಮನವಿ/ ಮರುಪರಿಶೀಲನಾ ನ್ಯಾಯಾಲಯದೊಂದಿಗೆ ಡಿಜಿಟಲ್ ಲಿಂಕ್ ಮಾಡಬಹುದು ಎಂದು ಇ-ಸಮಿತಿಯ ಪತ್ರ ತಿಳಿಸಿದೆ.
ನೆಗೋಶಿಯಬಲ್‌ ಇನ್ಸ್ಟ್ರುಮೆಂಟ್ಸ್ ಕಾಯಿದೆಯ ಸೆಕ್ಷನ್ 138ರ ಅಡಿಯಲ್ಲಿ ದಾಖಲಾಗುವ ಹಣ ಮರುಪಾವತಿ ದಾವೆ, ದೂರುಗಳು, ಜೀವನಾಂಶ ಅರ್ಜಿಗಳು, ಪರಸ್ಪರ ಸಮ್ಮತಿಯ ವಿಚ್ಛೇದನ ದೂರುಗಳು ಹಾಗೂ ಜಾಮೀನು ಅರ್ಜಿಗಳನ್ನು ಇ- ಫೈಲಿಂಗ್‌ಗೆ ಪರಿಗಣಿಸಬಹುದು ಎಂದು ಪತ್ರದಲ್ಲಿ ವಿವರಿಸಲಾಗಿದೆ.