ವ್ಯಕ್ತಿಗಳು, ಅದರಲ್ಲಿಯೂ ಪತ್ರಕರ್ತರು ಅಥವಾ ಮಾಧ್ಯಮ ಸಿಬ್ಬಂದಿಗೆ ಸೇರಿದ ಫೋನ್‌ ಅಥವಾ ಇತರೆ ಡಿಜಿಟಲ್ ಸಾಧನಗಳ ಶೋಧ ಮತ್ತು ವಶಪಡಿಸಿಕೊಳ್ಳುವಿಕೆ ನಿಯಂತ್ರಿಸಲು ಮಾರ್ಗಸೂಚಿ ಅಗತ್ಯವಿದೆ ಎಂದು ಸುಪ್ರೀಂ ಕೋರ್ಟ್ ಮಂಗಳವಾರ ಹೇಳಿದೆ [ಫೌಂಡೇಶನ್ ಫಾರ್ ಮೀಡಿಯಾ ಪ್ರೊಫೆಷನಲ್ಸ್ ಮತ್ತು ಭಾರತ ಒಕ್ಕೂಟ ಇನ್ನಿತರರ ನಡುವಣ ಪ್ರಕರಣ].
ಮಾಧ್ಯಮ ವೃತ್ತಿಪರರು ತಮ್ಮ ಸಾಧನಗಳಲ್ಲಿ ತಮ್ಮ ಸುದ್ದಿಮೂಲಗಳ ಬಗ್ಗೆ ಗೌಪ್ಯ ಮಾಹಿತಿ ಅಥವಾ ವಿವರಗಳನ್ನು ಹೊಂದಿರುವ ಸಾಧ್ಯತೆ ಇರುತ್ತದೆ ಎಂದು ನ್ಯಾಯಮೂರ್ತಿಗಳಾದ ಸಂಜಯ್ ಕಿಶನ್ ಕೌಲ್ ಮತ್ತು ಸುಧಾಂಶು ಧುಲಿಯಾ ಅವರಿದ್ದ ಪೀಠ ಹೇಳಿತು.
"ಮಾಧ್ಯಮ ವೃತ್ತಿಪರರು, ತಮ್ಮ ಫೋನ್‌ಗಳಲ್ಲಿ ಸುದ್ದಿಮೂಲಗಳು, ಸಂಪರ್ಕ ಮಾಹಿತಿಗಳನ್ನು ಇರಿಸಿಕೊಂಡಿರುತ್ತಾರೆ. ಹಾಗಾಗಿ, ಕೆಲ ಮಾರ್ಗಸೂಚಿಗಳು ಇರಬೇಕು. ಇದು ಗಂಭೀರ ವಿಚಾರ" ಎಂದು ನ್ಯಾಯಮೂರ್ತಿ ಕೌಲ್ ಮೌಖಿಕವಾಗಿ ಹೇಳಿದರು. ಇದಕ್ಕೆ ನ್ಯಾ. ಧುಲಿಯಾ ತಲೆದೂಗಿದರು.
ಕಾನೂನು ಜಾರಿ ಸಂಸ್ಥೆಗಳು ಡಿಜಿಟಲ್ ಸಾಧನ ಶೋಧಿಸಲು ಮತ್ತು ವಶಪಡಿಸಿಕೊಳ್ಳಲು ಮಾರ್ಗಸೂಚಿಗಳನ್ನು ಜಾರಿಗೆ ತರಲು ಕೋರಿ ಫೌಂಡೇಶನ್ ಫಾರ್ ಮೀಡಿಯಾ ಪ್ರೊಫೆಷನಲ್ಸ್ ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ (ಪಿಐಎಲ್) ಅರ್ಜಿಯ ವಿಚಾರಣೆ ವೇಳೆ ನ್ಯಾಯಾಲಯ ಈ ಅಭಿಪ್ರಾಯ ವ್ಯಕ್ತಪಡಿಸಿದೆ.