ಕಲ್ಯಾಣ ನಿಧಿಯನ್ನು ಖಾತರಿಯಾಗಿಟ್ಟುಕೊಂಡು ವಕೀಲರಿಗೆ ಬಡ್ಡಿರಹಿತ ಸಾಲ ನೀಡಬೇಕು: ಬಸವರಾಜ ಪಾಟೀಲ ಕ್ಯಾತನಾಳ

ಹಿರಿಯ ವಕೀಲರು ನ್ಯಾಯಾಲಯಕ್ಕೆ ಹಾಜರಾಗಬಾರದು ಎಂದು ಸೂಚಿಸಲಾಗಿದ್ದು, ತುರ್ತು ಪ್ರಕರಣಗಳಿದ್ದರೆ ವಿಡಿಯೋ ಕಾನ್ಫರೆನ್ಸ್ ಮೂಲಕ ವಿಚಾರಣೆಯಲ್ಲಿ ಪಾಳ್ಗೊಳ್ಳಬಹುದಾಗಿದೆ. ಕಳೆದ ಮಾರ್ಚ್‌ನಿಂದ ನ್ಯಾಯಾಲಯಗಳು ಬಂದ್ ಆಗಿರುವುದರಿಂದ ಕಕ್ಷಿದಾರರು ಗಣನೀಯವಾಗಿ ಕಡಿಮೆಯಾಗಿದ್ದಾರೆ. ಇದರಿಂದ ಇಡೀ ವಕೀಲರ ಸಮುದಾಯ ಆರ್ಥಿಕ ಸಮಸ್ಯೆಯ ಸುಳಿಯಲ್ಲಿ ಸಿಲುಕಿದೆ. ಸ್ವಾಭಿಮಾನ ಮತ್ತಿತರ ಕಾರಣಕ್ಕಾಗಿ ಬಹುತೇಕರು ಬಹಿರಂಗವಾಗಿ ಮಾತನಾಡುತ್ತಿಲ್ಲ.

ವಕೀಲರಿಗೆ ತಲಾ ₹5 ಸಾವಿರ ಪರಿಹಾರ ನೀಡುವ ಯೋಜನೆಯನ್ನು ರಾಜ್ಯ ವಕೀಲರ ಪರಿಷತ್ತು ಜಾರಿಗೆ ತಂದಿತ್ತು. ಇದರ ಅನುಕೂಲ ಪಡೆಯುವಂತೆ ಎಲ್ಲರಿಗೂ ಮಾಹಿತಿ ರವಾನಿಸಿದ್ದೇವೆ. ನಮ್ಮ ನ್ಯಾಯವಾದಿಗಳ ಸಂಘದಲ್ಲಿ 285 ಸದಸ್ಯರಿದ್ದು, ಸುಮಾರು 50 ಮಂದಿಗೆ ಯೋಜನೆಯ ಲಾಭ ದೊರೆತಿದೆ. ಕೆಲವು ನಿರ್ಬಂಧಗಳ ಹಿನ್ನೆಲೆಯಲ್ಲಿ ಬಹುತೇಕರಿಗೆ ಯೋಜನೆಯ ಲಾಭ ದಕ್ಕಿಲ್ಲ. ಇನ್ನು ಕೋವಿಡ್‌ಗೆ ತುತ್ತಾದವರಿಗೆ ವಕೀಲರ ಕಲ್ಯಾಣ ನಿಧಿಯಿಂದ ₹50 ಸಾವಿರ ನೀಡಲಾಗುತ್ತದೆ. ಇದಕ್ಕೆ ಅರ್ಜಿ ಹಾಕುವಂತೆ ಮಾಹಿತಿ ಒದಗಿಸಿದ್ದೇವೆ.

ನಮ್ಮ ಯಾದಗಿರಿ ಜಿಲ್ಲಾ ಕೇಂದ್ರವಾಗಿದ್ದರೂ ತಾಲ್ಲೂಕಿನ ರೀತಿಯಲ್ಲಿಯೇ ಇದೆ. ಇಲ್ಲಿನ ಶೇ.75ರಷ್ಟು ವಕೀಲರಿಗೆ ವಿಡಿಯೋ ಕಾನ್ಫರೆನ್ಸ್ ಮತ್ತು ವರ್ಚುವಲ್ ಕಲಾಪ ಹೊಸ ಅನುಭವ. ಬಹುತೇಕ ಹಿರಿಯ ವಕೀಲರಿಗೆ ಮೊಬೈಲ್ ಅಪರೇಟ್ ಮಾಡುವುದೇ ತಿಳಿದಿಲ್ಲ. ಇದರರ್ಥ ಅವರು ದಡ್ಡರೆಂದಲ್ಲ, ತಂತ್ರಜ್ಞಾನಕ್ಕೆ ಅವರು ಒಗ್ಗಿಕೊಂಡಿಲ್ಲ. ವಿಡಿಯೋ ಕಾನ್ಫರೆನ್ಸ್‌ನಲ್ಲಿ ಪಾಲ್ಗೊಳ್ಳಲು ಕಿರಿಯ ವಕೀಲರನ್ನು ಹಿರಿಯ ವಕೀಲರು ಕೋರಿಕೊಳ್ಳುತ್ತಿದ್ದಾರೆ. ವಿಡಿಯೋ ಕಾನ್ಫರೆನ್ಸ್‌ನಲ್ಲಿ ಪಾಲ್ಗೊಳ್ಳುವಷ್ಟು ತಾಳ್ಮೆ ಹಿರಿಯ ವಕೀಲರಲ್ಲಿ ಉಳಿದಿಲ್ಲ. ಮಧ್ಯಾಂತರದಲ್ಲಿ ತಾಂತ್ರಿಕ ಸಮಸ್ಯೆಗಳಾದರೆ ಕಿರಿಕಿರಿಯಾಗುತ್ತದೆ. ಬಹಳಷ್ಟು ಸಂದರ್ಭದಲ್ಲಿ ಯಾರು ಏನು ಹೇಳುತ್ತಿದ್ದಾರೆ ಎಂಬುದೇ ತಿಳಿಯುವುದಿಲ್ಲ. ಗೌಪ್ಯತೆ, ಸಂಕೋಚ ಮತ್ತಿತರ ಮನೋವೈಜ್ಞಾನಿಕ ಕಾರಣಗಳಿಂದಾಗಿ ಕಕ್ಷಿದಾರರು ವರ್ಚುವಲ್ ಕಲಾಪದಲ್ಲಿ ಮುಕ್ತವಾಗಿ ಭಾಗವಹಿಸುವುದಿಲ್ಲ. ಒಟ್ಟಾರೆ ಹೇಳಬೇಕೆಂದರೆ ನಮ್ಮಲ್ಲಿ ಅತ್ಯಂತ ಕಡಿಮೆ ಸಂಖ್ಯೆಯ ವರ್ಚುವಲ್ ವಿಚಾರಣೆಗಳು ನಡೆದಿವೆ.

ಕೆಲವು ಕಡೆ ಅಕ್ಟೋಬರ್ 5ರಿಂದ ಮತ್ತು ಕೆಲವು ಕಡೆ ಅಕ್ಟೋಬರ್ 12ರಂದು ಭೌತಿಕ ನ್ಯಾಯಾಲಯಗಳು ಆರಂಭವಾಗಲಿವೆ ಎಂದು ಹೇಳಲಾಗಿದೆ. ನಮ್ಮಲ್ಲಿ ಅಕ್ಟೋಬರ್ 5ರಿಂದ ದಿನಕ್ಕೆ ಐದು ಸಾಕ್ಷಿಗಳನ್ನು ನುಡಿಯಲು ಮಾತ್ರ ಅವಕಾಶ ಕಲ್ಪಿಸಲಾಗುತ್ತದೆ ಎಂಬ ಮಾಹಿತಿ ಇದೆ. ಭೌತಿಕ ನ್ಯಾಯಾಲಯ ನಡೆಸುವ ಸಂಬಂಧ ಗುರುವಾರ ಹೈಕೋರ್ಟ್ ಮುಖ್ಯ ನ್ಯಾಯಮೂರ್ತಿಯವರು ಬಹುತೇಕ ಎಲ್ಲಾ ಜಿಲ್ಲೆಗಳ ವಕೀಲರ ಸಂಘದ ಸದಸ್ಯರ ಜೊತೆ ವಿಡಿಯೋ ಕಾನ್ಫರೆನ್ಸ್ ಮೂಲಕ ಚರ್ಚಿಸಿದ್ದಾರೆ. ವಿಡಿಯೋ ಕಾನ್ಫರೆನ್ಸ್‌ ಆರಂಭವಾದ ಅರ್ಧಗಂಟೆಗೆ ನೆಟ್‌ವರ್ಕ್ ಸಮಸ್ಯೆಯಿಂದ ನಮ್ಮ ಯಾದಗಿರಿ ಸಂಪರ್ಕ ಕಡಿತವಾಯಿತು ಎಂದು ಸಭೆಯಲ್ಲಿ ಭಾಗವಹಿಸಿದ ವಕೀಲರು ಹೇಳಿದರು. ಬಳಿಕ ಸಂಪರ್ಕ ಸಾಧ್ಯವಾಗಲಿಲ್ಲವಂತೆ.

ನ್ಯಾಯಾಲಯದಲ್ಲಿ ವರ್ಚುವಲ್ ವಿಚಾರಣೆಗೆ ಅಗತ್ಯವಾದ ಎಲ್ಲಾ ತರಹದ ವ್ಯವಸ್ಥೆ ಇದೆ. ವಿಡಿಯೋ ಕಾನ್ಫೆರನ್ಸ್ ವಿಚಾರಣೆಯಲ್ಲಿ ಭಾಗವಹಿಸಲು ವಕೀಲರಾದ ನಾವುಗಳು ಸಿದ್ಧರಿಲ್ಲ. ನಮ್ಮಲ್ಲಿ ಬಹುತೇಕರಿಗೆ ಭೌತಿಕ ವಾದಸರಣಿಯಲ್ಲಿ ಆಸಕ್ತಿ ಹೆಚ್ಚು.

ಎಲ್ಲರಲ್ಲೂ ಇರುವಂತೆ ವಕೀಲರಲ್ಲೂ ಅನಿಶ್ಚಿತತೆ, ಆತಂಕ ಸಹಜವಾಗಿದೆ. ಇದೆಲ್ಲಾ ಯಾವಾಗ ಮುಗಿಯುತ್ತದೆ ಎಂದು ದೇವರಿಗೆ ಮೊರೆ ಇಡುವಂತಾಗಿದೆ. ನಮ್ಮಲ್ಲಿ 7-8 ಮಂದಿ ವಕೀಲರಿಗೆ ಕೋವಿಡ್ ಬಂದಿದೆ. ವಕೀಲರ ಹಲವು ಸಂಬಂಧಿಗಳು ಕೋವಿಡ್‌ಗೆ ತುತ್ತಾಗಿದ್ದಾರೆ. ವಕೀಲರೊಬ್ಬರ ಪತ್ನಿ ಈಚಗೆ ಕೋವಿಡ್‌ಗೆ ಬಲಿಯಾಗಿದ್ದಾರೆ. ಮನೆ ಮಂದಿ, ನೆಂಟರಿಷ್ಟರು ರೋಗಕ್ಕೆ ತುತ್ತಾಗಿರುವುದರಿಂದ ಹಲವು ವಕೀಲರು ಮಾನಸಿಕವಾಗಿ ಘಾಸಿಗೊಂಡಿದ್ದಾರೆ.

ವಕೀಲರ ಸಮುದಾಯವು ಸುಶಿಕ್ಷಿತವಾಗಿದ್ದು, ಸ್ವಾಭಿಮಾನ ಅಡ್ಡಿಬರುವುದರಿಂದ ಸರ್ಕಾರದ ನೆರವನ್ನೂ ಮುಕ್ತವಾಗಿ ಕೇಳಲಾಗದು. ಹೀಗಾಗಿ ₹3-4 ಲಕ್ಷದವರೆಗೆ ಬಡ್ಡಿರಹಿತ ಸಾಲ ನೀಡಬೇಕು. ಇದನ್ನು ಮರುಪಾವತಿಸಲು 2-3 ವರ್ಷ ಅವಕಾಶ ನೀಡಬೇಕು. ಇದು ಸಾಧ್ಯವಾಗದಿದ್ದರೆ ಕಡಿಮೆ ಬಡ್ಡಿಗೆ ಸಾಲ ನೀಡಲು ವ್ಯವಸ್ಥೆ ಮಾಡಬೇಕು. ಇದಕ್ಕೆ ವಕೀಲರ ಕಲ್ಯಾಣ ನಿಧಿಯನ್ನು ಖಾತರಿಯನ್ನಾಗಿ ಮಾಡಿಕೊಳ್ಳಬಹುದು. ಈ ನಿಟ್ಟಿನಲ್ಲಿ ಕೆಲಸವಾಗುವಂತೆ ಮಾಡಲು ಸಂಬಂಧಪಟ್ಟವರ ಮೇಲೆ ರಾಜ್ಯ ವಕೀಲರ ಪರಿಷತ್ತು ಒತ್ತಡ ಹೇರಬೇಕು.

ಎಸ್‌ಒಪಿ (ಪ್ರಮಾಣಿತ ಕಾರ್ಯಾಚರಣಾ ವಿಧಾನ) ನಿಯಮಾವಳಿಗಳ ಕಾರಣಕ್ಕೆ ಚುನಾವಣೆ ನಡೆಸಲಾಗಿರಲಿಲ್ಲ. ಈಗ ಅಕ್ಟೋಬರ್ 12ಕ್ಕೆ ಚುನಾವಣೆ ನಿಗದಿಯಾಗಿದೆ. ಇದರ ಹೊರತಾಗಿಯೂ ವಕೀಲರಿಗೆ ಎಲ್ಲ ರೀತಿಯ ಮಾಹಿತಿ ಒದಗಿಸುವುದು ಹಾಗೂ ಸಹಕಾರ ನೀಡುವ ಕೆಲಸವನ್ನು ಮಾಡಿದ್ದೇವೆ.